Áburðarverðskrá 2019

Græðir áburður

Áburðarverðskrá Græðis 2019 er komin út og hækkar hún að meðaltali um 15% á milli ára. Verðhækkunin nú er tilkomin vegna hækkana á áburði á erlendum mörkuðum og veikingu á krónunni.

Líkt og undanfarin ár flytur Bústólpi inn sinn áburð í samstarfi við Fóðurblönduna og nær sölusvæðið yfir Eyjafjörð, Þingeyjarsýslur og austur um t.o.m. Vopnafirði.

Bestu verð fást ef áburður er pantaður fyrir 31. janúar 2019 og greiddur fyrir eindaga 15. mars 2019, en einnig eru í boði hagstæðir vaxtalausir greiðslusamningar líkt og í fyrra.

Við bjóðum áfram sérstakan vildarafslátt til tryggra viðskiptavina Bústólpa.

Nýja verðskrá má sjá hér: Áburðarverðskrá Bústólpa 2019
og vöruskrá: Áburðarvöruskrá Græðis

Áburðarrit Bústólpa: Græðir 2019

Í ár bjóðum við öllum sem panta fyrir 31. janúar og kaupa 10 sekki eða fleiri frían flutning heim.

Nýr framleiðslustaður fyrir blöndun og sekkjun

Áburðarframleiðslan fyrir Græðir áburð hefur verið flutt til Finnlands. Finnar hafa mjög góða reynslu í meðhöndlun á áburði og hafa í áratugaskeið framleitt hágæðaáburð til bænda. Okkar nýi sekkjunarstaður uppfyllir allar okkar gæðakröfur varðandi framleiðslu og sekkjun á þeim áburði sem Fóðurblandan og samstarfsaðilar munu bjóða uppá.

Nýir og endurbættir stórsekkir

Til að tryggja gæði alla leið til okkar viðskiptavina hafa stórsekkir undir Græði áburð verið endurhannaðir frá grunni. Bæði hafa þeir verið styrktir sérstaklega og útbúnir með góðri lausn á lokun. Nýr framleiðandi á sekkjum er frá Bretlandi og uppfyllir alla gæðastaðla sem þörf er á ásamt því að vera vottun frá ISO 9001/2000 quality system.

Nýjar áburðarblöndur með magnesíum og selen                                                                                                                                                  

Fjölgræðir 6 - NPK áburður með gildunum 20-10-10. Uppfyllir þarfir meðaltúna sem fá að auki góða skammta af magnesíum og selen. Hentar vel þar sem ekki er borinn á búfjáráburður. Einnig góður fyrir grænfóðursrækt, bygg og hafra.

Fjölgræðir 12 - NPK áburður með gildunum 22-8-7 áburður. Ætlaður til notkunar einn og sér á tún í góðri rækt. Einnig hentugur með búfjáráburði á efnasnauð tún. Góður á beitartún. Hentugir skammtar af magnesíum og selen. Báðar þessar blöndur innihalda magnesíum með háan vatnsleysanleika.

 Hráefnin í áburðinum skipta máli uppá nýtingu og sprettu

Sérhannaður og fosfórríkur áburður með háan vatnsleysanleika

Græðir áburður er hannaður fyrir íslenskar aðstæður. Áburðurinn er fosfórríkur og með háan vatnsleysanleika sem hentar vel aðstæðum á  Íslandi þar sem er kalt loftslag, stuttur vaxtatími og sérstök jarðvegsgerð krefst hærra fosfórsinnihalds.

Kalkríkar tegundir

Köfnunarefnið í Græði áburði er kalkríkara en hjá öðrum íslenskum innflytjendum áburðar. Köfnunarefnisáburðurinn inniheldur 8% kalsium (kalk) en það er  mikilvægt til þess að vinna gegn súrnun jarðvegs en súr jarðvegur eykur hættu á kalskemmdum. Rétt sýrustig jarðvegs tryggir bæði meiri uppskeru og betri heygæði.

Fjölkorna og einkorna ábuður

Í Græði áburði eru öll áburðarkornin einkorna. Við framleiðslu á Fjölgræði eru einkorna áburðartegundir einnig aðal hráefnin, en áburðurinn telst þó fjölkorna. Kornastærð og eðlisþyngd er því jöfn sem tryggir bestu mögulegu dreifigæði.

Áburður án kadmium

Græðir áburður inniheldur ekki þungmálma eins og kadmium. Fosfórinn  í tegundum Græðis  er upprunninn frá Kola-skaga. Framleiðendur í Evrópu nota jafnan ódýran fosfór frá Norður Afríku sem inniheldur mikið af kadmium.

Selenbættur áburður

Niðurstöður heysýna hafa sýnt að selen er að skila sér vel í gróffóðrið. Við munum nú í ár bjóða upp á sex tegundir með seleni: Græðir 8, Græðir 9, Fjölmóða 3, Fjölmóða 4, Fjölgræðir 6, Fjölgræðir 6b, Fjölgræðir 7, Fjölgræðir 9 og Fjölgræðir 12.

Bændur eru hvattir til að hafa samband við sölumenn okkar sem munu leiðbeina frekar um val á áburðartegundum og greiðslukjörum.

Starfsfólk Bústólpa ehf.